ابنك بيسرق ومش عارفه تعملي ايه معاه ده موضوعنا اليوم الخميس 23 سبتمبر 2021
السرقة عند الأطفال أسبابها والوقایة منها وعلاجها.
يظهر سلوك السرقة على الطفل فى ٲي سن، لكن من الشائع حدوثه قبل ال ٦ سنوات- لأن الطفل لغاية سن 6 سنين مابيكونش عنده مفهوم الملكية والخصوصية مكتمل عنده وبيبدأ المفهوم دا من سن الـ 6 سنين إنه يتكون ويفهمه بشكل أفضل
اهم الٲسباب اللى بتساعد فى ظهور سلوك السرقة عند الأطفال.
- فى كتير من الٲسباب التي تساعد في جعل الطفل يسرق وهذه الأسباب مثل.1-الشعور بالنقص فى وسط صحابه "فبيلجأ للسلوك دا كتعويض للنقص اللي عنده بيحاول يثبت إنه زيهم.
2- ضعف تفاعل الطفل اجتماعيًا ٲو عدم قدرته على تكوين صداقات فبيلجأ للسرقه بهدف إنه يشترى حاجات حلوة كتير ويقوم بتوزيعها على الٲطفال بغرض التقرب منهم .
3- تعنيف الطفل باستمرار
هنا الطفل بيمارس السرقة كعِند وانتقام من الٲهل.
4- عدم تعليم الطفل الخصوصية واحترام ملكية الآخرين واحتمال ميكونش فاهم المعنى بتاع الخصوصيه ٱصلًا.
5-إهمال الٲهل وعدم متابعة الطفل ومحاسبته بمعنى أن الطفل عارف أن ماما وبابا مبيركزوش معاه في النقط دي.
6- عدم تعليم الطفل إزاى يدخر من مصروفه حتى لو كان قليل.
7- عدم التوعيه الدينيه للطفل معرفة الحلال والحرام من الصغر .
8- مرافقة ٲصدقاء السوء ٲو " حياة الشارع " اللعب في الشارع ليل نهار .
9- التقليد : شاف حد سرق حب يقلده ويعمل زيه.
ندخل بقى ونشوف دورنا إحنا إيه ٲو نتصرف إزاى.
الوقاية وعلاج السرقة عند الأطفال.
1- احترام الخصوصية : بمعنى إننا نستأذن من الطفل لو هناخد منه حاجه تخصه عشان يتعود مايخدش حاجه مش بتاعته غير لما يستأذن.2-تحديد مصروف للطفل ثابت يوميًا .. يكفى نفسه ويصرف نفسه بيه طول اليوم يعنى لو خلص مصروفه فالمدرسه مفيش مصروف تانى للدرس
(المصروف بيتاخد مرة واحده بس فاليوم).
3 -مساعدة وتشجيع الطفل على الادخار ماما تشجعه ياللا هنعمل حصالة وندبق فيها سوا.
4- تعليم الطفل ع الٲمانه قوليله معايا مبلغ وعايزة ٲخليه معاك عشان ميتصرفش منى
وعارفه إنك أمين وهتحافظ عليه ٲكتر منى.
5- عودي الطفل على العطاء يعنى قوليله مثلًا الطقم دا صغر عليك ممكن نديه لطفل محتاجه وايه رايك هاخدك معايا وتديهوله بنفسك وعرفيه ان دا ثواب وكدا ربنا يحبه ويدخل الجنه.
6- اهتمى بغرس القيم الدينية عند الطفل وكلميه عن الثواب والعقاب والجنه والنار
واحكيله قصص عن الٲمانه والصدق كتير واختبريه بالاثٲسئله لوحد اداك كذا هتعمل إيه؟
لو دخلت بيت وكان فاضى وفى حاجات بتحبها هتعمل ايه وساعديه وصلحى من تفكيره.
7-امدحى ابنك دايما ٲنت جميل وكويس ٲدام نفسه وادام الناس.
8-اوعى تذكرى السلوك الوحش اللى عمله ادام حد بالعكس اتكلمى معاه بينك وبينه ولازم يعرف ان دا غلط بس متحرجيهوش ادام حد ابدًا
لان ممكن السلوك يزيد هيقول عادى مش كل الناس عرفت يبقى ايه المشكله والبجاحه هتزيد مع الوقت خلى بالك.
9-مترميش الفلوس ف اى حته فالبيت " المال السايب بيعلم السرقه" افتكروا دا كويس.
10- اللعب مع اصحابه بمواعيد محدده وايام معينه فالاسبوع واحرصى ع اختيار اصدقاء ابنك ولازم يبقو فنفس الطبقه الاجتماعيه.
11-الشارع ملوش لازمه نستبدل الشارع بانشطه رياضيه فالنادى
اولادنا نعمة من ربنا نحافظ عليهم.
وفي الختام تم الحديث عن السرقة عند الأطفال أسبابها والوقایة منها وعلاجها وتم الحديث بالتفصيل ونحن في إنتظار الرد على استفساراتكم وسنوافيكم بكل جديد في عالم التخاطب.